തമിഴ്നാട് മുഖ്യമന്ത്രി ജയലളിതയുടെ മരണത്തില് സംശയം പ്രകടിപ്പിച്ച മദ്രാസ് ഹൈക്കോടതിയുടെ നിരീക്ഷണം പുതിയ വിവാദത്തിന് തിരികൊളുത്തിയേക്കും. ജയലളിതയുടെ മരണം സംബന്ധിച്ച് ജുഡീഷ്യല് അന്വേഷണം നടത്തണമെന്ന് ആവശ്യപ്പെട്ട് എഐഎഡിഎംകെ പ്രവര്ത്തകന് പി എ ജോസഫ് നല്കിയ പൊതുതാല്പര്യ ഹര്ജിയില് പരിഗണിക്കവേ ജസ്റ്റിസ് വൈദ്യലിംഗമാണ് ഇക്കാര്യം അഭിപ്രായപ്പെട്ടത്. മാദ്ധ്യമങ്ങള് ധാരാളം സംശയങ്ങളും ചോദ്യങ്ങളും മുന്നോട്ട് വയ്ക്കുന്നുണ്ട്. എനിക്കും വ്യക്തിപരമായി സംശയങ്ങളുണ്ട് – വൈദ്യലിംഗം പറഞ്ഞു.
ഒരു ദിവസം പറയുന്നു, അവര് നടക്കുന്നുണ്ടെന്ന്. പിന്നൊരു ദിവസം പറയുന്നത് ഉടന് ആശുപത്രി വിടും എന്ന്. അവസാനം സംഭവിച്ചതെന്താണ്. എംജിആറിന്റെ ആരോഗ്യനില സംബന്ധിച്ച് വീഡിയോ പുറത്തുവിട്ടിരുന്നതായി വൈദ്യലിംഗം ചൂണ്ടിക്കാട്ടി. ജീവിക്കാനുള്ളത് അവകാശം മൗലികാവകാശമാണ്. എന്താണ് സംഭവിച്ചതെന്ന് ജനങ്ങള് അറിയണം – വൈദ്യലിംഗം വക്തമാക്കി. ജയലളിതയുടെ മരണത്തില് സിബിഐ അന്വേഷണം ആവശ്യപ്പെട്ട് അണ്ണാ ഡിഎംകെ എംപി ശശികല പുഷ്പ അടക്കമുള്ളവര് കോടതിയെ സമീപിക്കുന്നുണ്ട്.