ബംഗാള്‍ ഉള്‍ക്കടലില്‍ ന്യൂനമര്‍ദ്ദം രൂപപ്പെട്ട സാഹചര്യത്തില്‍ ഇന്നും നാളെയും കേരളത്തില്‍ ശക്തമായ മഴയ്ക്ക് സാധ്യതയുള്ളതായി കാലാവസ്ഥാ വകുപ്പിന്റെ മുന്നറിയിപ്പ്. കേരളത്തിന്റെ മധ്യ, തെക്കന്‍ ജില്ലകളില്‍ ശക്തമായ മഴയുണ്ടായേക്കാമെന്നാണ് കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ആലപ്പുഴ, എറണാകുളം ജില്ലകളില്‍ ചൊവ്വാഴ്ച ശക്തമായ മഴയ്ക്ക് സാധ്യതയുണ്ട് എന്ന് കാലാവസ്ഥാ കേന്ദ്രം പറയുന്നു.
14 മുതല്‍ 16 വരെ ഇടുക്കി, ആലപ്പുഴ ജില്ലകളിലും എറണാകുളം മൂവാറ്റുപുഴ ഭാഗത്തും ശക്തമായ മഴയുണ്ടാകാനിടയുണ്ട്. കോട്ടയം ജില്ലയുടെ കിഴക്കന്‍ ഭാഗങ്ങളിലടക്കം മലയോര മേഖലകളില്‍ ശക്തമായ മഴയുണ്ടാകാം. കാസറഗോഡ്, കണ്ണൂര്‍, കോഴിക്കോട് ജില്ലകളിലും മഴയുണ്ടായേക്കാം. വയനാട്ടില്‍ തീവ്രമായ മഴയുണ്ടാകില്ല എന്നാണ് പ്രവചനം.
ഓഗസ്റ്റ് 13ന് (ചൊവ്വാഴ്ച) ഇടുക്കി, പാലക്കാട്, മലപ്പുറം വയനാട് ജില്ലകളിലും 14ന് എറണാകുളം, ഇടുക്കി, പാലക്കാട്, മലപ്പുറം ജില്ലകളിലും കാലാവസ്ഥാ നിരീക്ഷണ വകുപ്പ് ഓറഞ്ച് അലര്‍ട്ട് നല്‍കിയിട്ടുണ്ട്. 115 മില്ലിമീറ്റര്‍ മുതല്‍ 204.5 മില്ലിമീറ്റര്‍ വരെ മഴയ്ക്കാണ് ഈ ദിവസങ്ങളില്‍ സാധ്യതയുള്ളത്. അതേസമയം മത്സ്യത്തൊഴിലാളികള്‍ക്ക് ജാഗ്രത നിര്‍ദ്ദേശം നല്‍കിയിട്ടുണ്ട്. ശക്തമായ കാറ്റിനും ഉയര്‍ന്ന തിരമാലകള്‍ക്കും സാധ്യതയുണ്ടെന്നാണ് മുന്നറിയിപ്പ്.
This post was last modified on August 14, 2019 11:19 pm