സംസ്ഥാനത്തുൾപ്പെടെ പശ്ചിമഘട്ടത്തിന്റെ നിലവിലെ അവസ്ഥ അതീവ ഗുരുതരമെന്ന് റിപ്പോര്‍ട്ടുകൾക്ക് കൂടുതൽ ബലം നൽകി ജവഹ‍ർലാൽ നെഹ്റു സർവകലാശാലയുടെ പഠനറിപ്പോര്‍ട്ട്. പശ്ചിമഘട്ടം പ്രത്യേക അവസ്ഥയിലൂടെയാണ് കടന്നു പോകുന്നതെന്നാണ് റിപ്പോര്‍ട്ട് നൽകുന്ന സൂചന. നിലവിലെ സാഹചര്യത്തിൽ സംസ്ഥാനത്ത് പ്രകൃതി ദുരന്തങ്ങള്‍ ആവര്‍ത്തിക്കാനുള്ള സാധ്യത കൂടുതലാണെന്നും വ്യക്തമാക്കുന്നതായി പഠനത്തിന്റെ അടിസ്ഥാനത്തിലുള്ള എഷ്യാനെറ്റ് ന്യൂസ് റിപ്പോർട്ട് വ്യക്തമാക്കുന്നു. കഴിഞ്ഞ വർഷത്തെ മഹാപ്രളയത്തിന്റെ അടിസ്ഥാനത്തിൽ നടത്തിയ പഠനത്തിന്റെ പശ്ചാത്തലത്തിലാണ് ദുരന്തഗവേഷണ വിഭാഗത്തിന്റെ നിഗമനങ്ങൾ.
പശ്ചിമഘട്ടത്തിന്റെ ഭാഗമായ പ്രദേശങ്ങളിൽ മണ്ണിന്റെ പ്രതലം താഴേക്ക് താഴ്ന്നുപോകുന്ന പ്രതിഭാസമുണ്ട്. തീരപ്രദേശങ്ങളിൽ നടക്കുന്ന നിര്‍മ്മാണ പ്രവർത്തനങ്ങൾ പോലും പശ്ചിമഘട്ടത്തിലെ പാറകളെ ബാധിക്കുന്നുണ്ട്. ഇതിന് പുറമെ മലനിരകളിൽ നിന്നുള്ള സ്വാഭാവിക ഒഴുക്കിനെ തടസപ്പെടുത്തുന്ന രീതിയിലുള്ള നിർമാണ പ്രവർത്തനങ്ങൾ ഭൂമിലേക്കുള്ള ജലത്തിന്റെ മർദ്ദം കൂട്ടുന്നുണ്ട്, ഇത് മണ്ണിടിച്ചിലിനു കാരണമാകുന്നുണ്ടെന്നും ജവഹ‍ർലാൽ നെഹ്റു സർവകലാശാലയിലെ ദുരന്തഗവേഷണവിഭാഗം മേധാവി അമിതാ സിങ്ങ് പറയുന്നു
അതേസമയം, മലയോരമേഖലകളില്‍ മാത്രമല്ല, ഇടനാട്ടിലും തീരപ്രദേശങ്ങളിലും ഒരുപോലെ ദുരന്തസാധ്യതയുണ്ടെന്ന് സർവകലാശാല ദുരന്തഗവേഷണവിഭാഗത്തിന്റെ റിപ്പോര്‍ട്ട് പറയുന്നു. ഭൂവിനിയോഗത്തിൽ കാതലായ മാറ്റമാണ് ഇതിനെ പ്രതിരോധിക്കാൻ റിപ്പോർട്ട് ശുപാർശ ചെയ്യുന്നത്.
ഭൂമിക്കനുയോജ്യമല്ലാത്ത നിര്‍മ്മാണ പ്രവര്‍ത്തനങ്ങള്‍ തുടങ്ങി മണ്ണൊലിപ്പ്, ക്വാറികളുടെ പ്രവര്‍ത്തനം എന്നിവയും സംസ്ഥാനത്തെ ദുരന്തങ്ങൾക്ക് ആക്കം കൂട്ടുന്നുണ്ട്. പരിസ്ഥിതി ആഘാത പഠനങ്ങള്‍ നടത്താതെയാണ് പശ്ചിമഘട്ടത്തില്‍ പോലും നിര്‍മ്മാണ പ്രവര്‍ത്തനങ്ങള്‍ നടക്കുന്നത്. തീരങ്ങളിലെ കയ്യേറ്റം നദികളുടെ സ്വാഭാവിക ഒഴുക്കിനെ തടസപ്പെടുത്തുന്നു. വെള്ളം കെട്ടിനില്‍ക്കുന്നത് മൂലം ഉണ്ടാകുന്ന പ്രത്യാഘാതവും ഗുരുതരമാണെന്നും റിപ്പോര്‍ട്ടില്‍ പറയുന്നു.
Read Azhimukham: ദുരിതാശ്വാസ ക്യാമ്പിൽ അച്ഛൻ കുഴഞ്ഞുവീണ് മരിച്ച മനുഷയ്ക്ക് സ്ഥലം വാങ്ങി വീടൊരുക്കും: സംവിധായകൻ ജിബു ജേക്കബ്ബിന്റെ സഹോദരൻ ജിജു കളക്ടർക്ക് എഴുതി നൽകി
This post was last modified on August 16, 2019 7:38 am