പി എസ് സി നടത്തിയ അസിസ്റ്റന്റ് പബ്ലിക് പ്രോസിക്യൂട്ടര്‍ പരീക്ഷയില്‍ ക്രമക്കേടെന്ന് വ്യാപക ആരോപണം. എണ്‍പത് ശതമാനം ചോദ്യങ്ങളും ഒരു ഗൈഡില്‍ നിന്നും വന്നതാണ് ആരോപണത്തിന്റെ അടിസ്ഥാനം. വള്ളിപുള്ളി തെറ്റാതെയാണ് ഈ ഗൈഡില്‍ നിന്നും ചോദ്യങ്ങള്‍ വന്നത്. ഇതില്‍ അസ്വാഭാവികതയുണ്ടെന്നാണ് ഉദ്യോഗാര്‍ത്ഥികള്‍ പറയുന്നത്.
തെളിവുകളടക്കം പരാതി നല്‍കിയെങ്കിലും ഇത് അവഗണിച്ച് നിയമന നടപടികളുമായി മുന്നോട്ട് പോകുകയാണ് പി എസ് സി. ഇക്കഴിഞ്ഞ ജനുവരി ഇരുപത്തി രണ്ടിനായിരുന്നു എപിപി പരീക്ഷ. 100 ചോദ്യങ്ങളില്‍ എണ്‍പതെണ്ണവും വന്നത് യൂണിവേഴ്‌സല്‍ പബ്ലിക്കേഷന്‍സിന്റെ ഗൈഡില്‍ നിന്നാണ്. ചോദ്യങ്ങളിലെ പേരിന് പോലും ഒരു മാറ്റവും വരുത്താതെയാണ് ചോദ്യപേപ്പറില്‍ പകര്‍ത്തിയത്.
പരീക്ഷയെഴുതിയ ഒരു വിഭാഗം വിദ്യാര്‍ത്ഥികള്‍ക്ക് ഈ ഗൈഡില്‍ നിന്നാകും ചോദ്യങ്ങള്‍ വരികയെന്ന് സൂചന ലഭിച്ചിരുന്നതായും ആരോപണം ഉയര്‍ന്നിട്ടുണ്ട്. ഒരു ഗൈഡില്‍ നിന്ന് തന്നെ ചോദ്യങ്ങള്‍ ചോദിച്ച സംഭവമുണ്ടായപ്പോള്‍ പരീക്ഷ റദ്ദാക്കിയ പി എസ് സി ഇത്തവണ പരാതി അവഗണിക്കുകയാണ്.