വയനാട്ടിൽ നിന്ന് താൻ മത്സരിക്കുന്നതു സംബന്ധിച്ച് ഇതാദ്യമായാണ് കോൺഗ്രസ്സ് അധ്യക്ഷൻ പ്രതികരിക്കുന്നത്.
ദക്ഷിണേന്ത്യ നരേന്ദ്രമോദിയുടെ വിദ്വേഷത്തെ നേരിട്ടു കൊണ്ടിരിക്കുകയായിരുന്നെന്ന് കോൺഗ്രസ്സ് അധ്യക്ഷൻ രാഹുൽ ഗാന്ധി. കോൺഗ്രസ്സ് പ്രകടനപത്രിക പുറത്തിറക്കുന്ന ചടങ്ങിൽ സംസാരിക്കുകയായിരുന്നു അദ്ദേഹം. ഈ രാജ്യത്തിന്റെ തീരുമാനങ്ങളിൽ തങ്ങൾ ഉൾപ്പെട്ടിരുന്നില്ലെന്ന് അവർക്ക് തോന്നുന്നുണ്ടെന്നും രാഹുൽ പറഞ്ഞു. “ഇക്കാരണത്താൽ ഞാൻ ദക്ഷിണേന്ത്യക്ക് ഒരു സന്ദേശം നൽകാൻ ആഗ്രഹിക്കുന്നു. ഞങ്ങൾ നിങ്ങളോടൊപ്പമുണ്ട്. ഞാൻ നിങ്ങളോടൊപ്പം നിൽക്കുന്നു. ഇക്കാരണത്താലാണ് ഞാൻ കേരളത്തിൽ നിന്ന് മത്സരിക്കുന്നത്,” -രാഹുൽ വിശദീകരിച്ചു.
കേരളത്തിലെ വയനാട്ടിൽ നിന്ന് താൻ മത്സരിക്കുന്നതു സംബന്ധിച്ച് ഇതാദ്യമായാണ് കോൺഗ്രസ്സ് അധ്യക്ഷൻ പ്രതികരിക്കുന്നത്. ബിജെപിക്കെതിരായി രാജ്യം നിലകൊള്ളുമ്പോൾ സിപിഎമ്മിനെതിരെ മത്സരിക്കുന്നതും സംബന്ധിച്ച് വിമർശനങ്ങൾ ഉയർന്നിരുന്നു. ഇതിന്റെ പശ്ചാത്തലത്തിലാണ് രാഹുലിന്റെ പ്രസ്താവന.
