സംവിധായകന്‍ ജിനു എബ്രഹാമിനെതിരേ ഫെഫ്കയില്‍ പരാതി നല്‍കും
ജിനു എബ്രഹാം സംവിധാനം ചെയ്യുന്ന പ്രഥ്വിരാജ് ചിത്രമായ ആദം ജോണ്‍ എന്ന ചിത്രത്തിന്റെ ടൈറ്റില്‍ ഡിസൈനിംഗുമായി ബന്ധപ്പെട്ട് വിവാദം ഉയരുന്നു. സംവിധായകന്‍ പറഞ്ഞ വഞ്ചിച്ചെന്ന പരാതിയുമായി ജിത്തു ചന്ദ്രന്‍ എന്ന ഡിസൈനര്‍ രംഗത്തു വന്നിരിക്കുകയാണ്. ജിത്തുവിന്റെ പരാതിയെ അനുകൂലിച്ചും സമാനഅനുഭവം തങ്ങള്‍ക്കും നേരിട്ടതിന്റെ തെളിവുകളുമായി മറ്റു ഡിസനര്‍മാരും മുന്നോട്ടുവന്നതോടെ ഈ വിഷയം വലിയ ചര്‍ച്ചയായിരിക്കുകയാണ്. ജിനു എബ്രഹാമിനെതിരേ ഫെഫ്കയ്ക്ക് പരാതി നല്‍കാന്‍ ഒരുങ്ങുകയാണ് ജിത്തു ചന്ദ്രന്‍. എന്നാല്‍ ഷൂട്ടിംഗുമായി ബന്ധപ്പെട്ട് സ്‌കോട്‌ലാന്‍ഡിലുള്ള സംവിധായകന്‍ ജിനു എബ്രാഹം ഈ വിഷയത്തില്‍ പ്രതികരിച്ചിട്ടില്ല.
ജിത്തു ചന്ദ്രന്‍ ഫെയ്‌സ്ബുക്ക് പോസ്റ്റിലൂടെ മുന്നോട്ടുവയ്ക്കുന്ന പരാതി ഇതാണ്;
ഏകദേശം ഒരു വര്‍ഷം മുന്നെയാണ് മിസ്റ്റര്‍ ജിനു എബ്രഹാം, ‘ ആദം ‘ എന്ന ചിത്രത്തിന്റെ ടൈറ്റില്‍ ഡിസൈന്‍ ചെയ്യാന്‍ ഏല്‍പ്പിച്ചത്…പൃഥ്വിരാജ് ചിത്രമായതുകൊണ്ട് തന്നെ ഒന്നും നോക്കാതെ ചാടി വീണുചെയ്തു കൊടുക്കാന്‍ സന്നദ്ധനായി…ടൈറ്റില്‍ ഇഷ്ട്ടപ്പെട്ടാല്‍ പോസ്റ്റര്‍ ഡിസൈന്‍ തരും എന്ന ഉറപ്പില്‍ അഞ്ചിലധികം ടൈറ്റില്‍ വരച്ചിരുന്നു അന്ന്, ‘ അമേന്‍ ‘ പോലെ അല്ലെങ്കില്‍, അതുപോലെ ആര്‍ട്ടിസ്റ്റിക്ക് ആയിട്ടു വള്ളികളും, തൊങ്ങലുകളും, പഴവും കൊലയുമൊക്കെ വച്ച് വേണമെന്ന് പറഞ്ഞതിന്റെ അടിസ്ഥാനത്തില്‍ പലതും ചെയ്യിപ്പിച്ചു…അന്നൊക്കെ പൂര്‍ണ്ണ സന്തോഷത്തോടെ സ്വീകരിച്ച കാര്യങ്ങള്‍ ആയിരുന്നു അതെല്ലാം…കാരണം വലിയൊരു ടീം ആയിരുന്നു അണിയറയില്‍ എന്നത് കൊണ്ടുണ്ടായ അതിയായ സന്തോഷം തന്നെയായിരുന്നു…നിര്‍ദേശങ്ങള്‍ അനുസരിച്ച് മറ്റൊരു സുഹൃത്തിനെ കൊണ്ടുപോലും ടൈറ്റിലുകള്‍ വരപ്പിച്ചു…അതിനിടയില്‍ ചിത്രം നീങ്ങി, ഡിലെ ഉണ്ടാകുമെന്ന് അറിഞ്ഞു…മാസങ്ങള്‍ക്ക് ശേഷം ചിത്രത്തിന്റെ ഷൂട്ടിംഗ് ഉടന്‍ ആരംഭിക്കുമെന്നറിഞ്ഞപ്പോള്‍ പ്രസ്തുത ഡയറക്ടറോഡ് ഡിസൈന്‍ ടീം ആയിട്ടുണ്ടോ എന്നു ചോദിച്ചപ്പോള്‍ ഇല്ലെന്നായിരുന്നു മറുപടി…പിന്നീട് അദ്ദേഹം പറഞ്ഞതിന്റെ അടിസ്ഥാനത്തില്‍ വീണ്ടും മൂന്നു ടൈറ്റിലുകള്‍ വരയ്ക്കുകയും, അദ്ദേഹം പറഞ്ഞ വിധം ഒരു ബാക്ക് ഗ്രൗണ്ടില്‍ അത് സെറ്റ് ചെയ്ത് എടുക്കുകയുമുണ്ടായി…അവസാനം ചെയ്ത് അയച്ച ടൈറ്റിലിന് ‘പൊളിച്ചു’ എന്നുള്ള മറുപടിയും തുടര്‍ന്ന് ബാക്ക്ഗ്രൗണ്ട് കൂടി അതില്‍ തന്നെ സെറ്റ് ചെയ്യ് എന്ന നിര്‍ദേശവും കിട്ടിയിരുന്നു…അദ്ദേഹത്തിന്റെ നിര്‍ദേശ പ്രകാരം ഒരു ബാക്ക് ഗ്രൗണ്ടും ചെയ്ത് അയച്ച് കൊടുത്തിരുന്നു…പിന്നീടുള്ള ഓരോ ദിവസവും ഞാന്‍ വര്‍ക്കിനെ പറ്റി അപ്‌ഡേറ്റ് ചെയ്തിരുന്നെങ്കിലും ഒരു റിപ്ലേ പോലും തരാനുള്ള മര്യാദ അദ്ദേഹം കാണിച്ചിരുന്നില്ല, സ്‌കോട്ട്‌ലാന്‍ഡില്‍ ഷൂട്ട് ഉണ്ടായിരുന്നത് കൊണ്ടാകാം എന്ന് കരുതി സമാധാനിച്ചു അപ്പോഴെല്ലാം, കൊള്ളാം പൊളിച്ചു ഇതില്‍ വര്‍ക്ക് ചെയ്‌തോളു എന്ന് പറഞ്ഞ ഒരു വര്‍ക്ക് കൈവിട്ടു പോകുമെന്ന പ്രതീക്ഷ തീരെ ഇല്ലായിരുന്നു…
എല്ലാത്തിലുമുപരി ആ വര്‍ക്ക് പിന്നീട് വേണ്ടെന്നു വയ്ക്കുമ്പോളും, മറ്റൊരാളെ എല്‍പ്പിക്കുമ്പോഴും ഞങ്ങളെ അറിയിക്കുക എന്ന സാമാന്യ മര്യാദയെങ്കിലും മിസറ്റര്‍ ജിനു എബ്രഹാമിന് കാണിക്കാമായിരുന്നു…ഇഷ്ട്ടപ്പെട്ടില്ല എന്ന് പറഞ്ഞിരുന്നെങ്കിലും താങ്കളുടെ മര്യാദയായി തന്നെ കണക്കാക്കിയിരുന്നേനെ…ഇത് ആദ്യത്തെ അനുഭവമല്ല, ഞങ്ങള്‍ക്കും സുഹൃത്തുക്കള്‍ക്കും… ഇപ്പോള്‍ ഇതിവിടെ അവതരിപ്പിക്കാന്‍ ഉണ്ടായ കാരണം മറ്റൊന്നല്ല, ഇനി ഒരാളോടും നിങ്ങളുടെ ഈ നെറികെട്ട ഏര്‍പ്പാട് കാണിക്കരുത്…നിങ്ങള്‍ സ്‌ക്രിപ്റ്റ് എഴുതുന്നതും, ഡയറക്റ്റ് ചെയ്യുന്നതുമൊക്കെ പോലെ തന്നെ കഷ്ടപ്പെട്ടു തന്നെയാണ് ഓരോ ഡിസൈനറും നിങ്ങള്‍ക്ക് പറയുന്നതൊക്കെ ചെയ്തു തരുന്നത്…അല്ലാതെ ഞങ്ങള്‍ മുറ്റത്തെ മരത്തില്‍ നിന്നും ഉലുത്തിയിടുന്നതല്ല ഡിസൈനുകള്‍…
‘ FML-TTChithiraBold ‘ എന്ന ഫോണ്ടില്‍ ഒരു കുഞ്ഞിനെ കുത്തിക്കയറ്റി ടൈറ്റില്‍ ചെയ്താല്‍ മതിയായിരുന്നു എങ്കില്‍ താങ്കള്‍ എന്തിനാണ് ഇത്രയും ഘോരം ഘോരം
ഡയലോഗുകള്‍ അടിച്ച്, ഇത്രയും നാള്‍ കഷ്ടപ്പെടുത്തിയത് ഞങ്ങളെ ???
അതോ ഞങ്ങളൊക്കെ വെറും കൂലിപ്പണി എടുക്കുന്നവരും നിങ്ങളൊക്കെ കൊമ്പത്തെ ആള്‍ക്കാരും എന്ന വൃത്തികെട്ട ചിന്തയോ ??? അങ്ങനെ ആണെങ്കില്‍ തന്നെ പണി എടുത്തതിനുള്ള കൂലി തരാന്‍ മര്യാദ കാണിച്ചോ നിങ്ങള്‍ ??? ഈ പ്രവണത മലയാള സിനിമ ഇന്‍ഡസ്ട്രിയില്‍ നില നില്‍ക്കുന്നിടത്തോളം നമ്മള്‍ ഇതൊക്കെ വീണ്ടും അനുഭവിച്ചു കൊണ്ടു തന്നെ ഇരിക്കുമെന്നതില്‍ യാതൊരു തര്‍ക്കവുമില്ല, സിനിമ സംഘടനയായ FEFKA യിലെ മെമ്പര്‍ എന്ന നിലയ്ക്ക് ബന്ധപ്പെട്ട ഭാരവാഹിയെ അറിയിക്കാനുള്ള മര്യാദ ഞാന്‍ കാണിച്ചിട്ടുണ്ട്…പല പോസ്റ്റര്‍ ഡിസൈനര്‍മാരും കടന്നു പൊയ്‌ക്കൊണ്ടിരിക്കുന്ന അല്ലെങ്കില്‍ പോയിട്ടുള്ള സാഹചര്യം തന്നെയാണിത്, പലരും പറയാന്‍ മടിക്കുന്നതും, പേടിക്കുന്നതുമായ കാര്യങ്ങള്‍ തന്നെയാണ് ഇതെല്ലാം…ഇങ്ങനെയൊക്കെ ചെയ്യിപ്പിക്കുന്ന, ചെയ്യിപ്പിക്കാനിരിക്കുന്ന സുഹൃത്തുക്കള്‍ ഒരു കാര്യം മനസ്സിലാക്കൂ…ഞങ്ങളും വിശപ്പടക്കാന്‍ ആഹാരം കഴിക്കാറുണ്ട്, കറണ്ട് ബില്‍ അടയ്ക്കാറുണ്ട്, ഉറക്കം ത്യജിക്കാറുണ്ട്, അതിലൊക്കെ ഉപരി സിനിമയെ സ്വപ്നം കാണാറുണ്ട് ! അവസാനത്തെ പോയിന്റ് തന്നെയാണ് നിങ്ങളൊക്കെ അറിഞ്ഞോ അറിയാതെയോ മുതലെടുക്കുന്നതെന്ന് മനസ്സിലാക്കിയാല്‍ നന്ന്…!
ആദം എന്ന ചിത്രത്തിന് വേണ്ടി ചെയ്ത ടൈറ്റില്‍ ഡിസൈനുകള്‍ ആണ് ചുവടെ ചേര്‍ക്കുന്നത്, ഇതില്‍ അവസാനത്തെ ഡിസൈന്‍ ആണ് സംവിധായകന്‍ ഇഷ്ട്ടമായി എന്നും അതില്‍ വര്‍ക്ക് ചെയ്‌തോളു എന്നും പറഞ്ഞത്… ഇതില്‍ എന്റെ സുഹൃത്ത് ശ്രീ Sanesh Mvsanesh വരച്ച ഒരു ഡിസൈനും ഉള്‍പ്പെടുന്നു..അളിയാ അഡ്വാന്‍സ് കിട്ടുമ്പോ അതിന്റെ കാശ് തരാന്‍ ഇരിക്കുവായിരുന്നു, എന്തൊക്കെ സംഭവിച്ചാലും അത് ഞങ്ങള്‍ തന്നിരിക്കും !
ജിത്തുവിന്റെ ഫെയ്‌സ്ബുക്ക് പോസ്റ്റ് വന്നതിനു പിന്നാലെ ജിനു എബ്രാഹാം തങ്ങളെ കൊണ്ടും ടൈറ്റില്‍ ഡിസൈന്‍ ചെയ്യിപ്പിച്ചിരുന്നുവെന്ന വെളിപ്പെടുത്തലുമായി മറ്റു ചില ഡിസൈനര്‍മാരും രംഗത്തു വന്നു. തങ്ങള്‍ ചെയ്ത ഡിസൈനുകള്‍ തള്ളിയോ സ്വീകരിച്ചോ എന്നുപോലും പറയാതെ സംവിധായകന്‍ പറഞ്ഞു പറ്റിക്കുകയാണെന്ന പരാതിയാണ് ഇവര്‍ക്കും. സിനിമ ഇന്‍ഡസ്ട്രിയില്‍ ഇത്തരം വഞ്ചനകള്‍ മുന്‍പും ഉണ്ടായിട്ടുണ്ടെങ്കിലും പലരും ഇതൊന്നും തുറന്നു പറയാറില്ലെന്നും നിലനില്‍പ് ഭയന്നാണ് മൗനം പാലിക്കുന്നതെന്നും ജിത്തു രാമചന്ദ്രന്‍ അഴിമുഖത്തോടു പറഞ്ഞു. എന്നാല്‍ ആ ധൈര്യം താന്‍ കാണിക്കുകയാണെന്നും ഫെഫ്കയില്‍ ഇന്നു തന്നെ പരാതി നല്‍കുമെന്നും തങ്ങളുടെ ഭാഗത്താണു ന്യായമെന്ന് ബന്ധപ്പെട്ടവര്‍ക്കു മനസിലായെന്നും ജിത്തു പറഞ്ഞു.പൃഥ്വിരാജും ഭാവനയുമാണ് ഈ സിനിമിലെ പ്രധാന കഥാപത്രങ്ങള്‍.
