തനിക്ക് ഇഷ്ടമുള്ള ശരീരഭാഗങ്ങള് താന് പ്രദര്ശിപ്പിക്കുമെന്നും അത് സ്വാതന്ത്ര്യമാണെന്നും മാധുരി
സോഷ്യല് മീഡിയില് പങ്കുവയ്ക്കുന്ന തന്റെ ചിത്രങ്ങള്ക്ക് അശ്ലീല കമന്റ് ചെയ്ത ആരാധകന് മറുപടി കൊടുത്ത് ജോസഫ് സിനിമയിലെ നായിക. മാധുരി. ഗ്ലാമറസ് ആയ ചിത്രങ്ങള് പ്രദര്ശിപ്പിക്കുന്നതില് മാധുരിയെ പരിഹസിച്ചുകൊണ്ട് ഇട്ട കമന്റിന്, ഇത്തരത്തിലുള്ള ചോദ്യങ്ങള് ചോദിക്കുന്ന എല്ലാവര്ക്കുമുള്ള മറുപടി എന്ന നിലയിലാണ് മാധുരി പ്രതികരിച്ചിരിക്കുന്നത്.
മോശമായ ഒത്തിരി സന്ദേശങ്ങളും കമന്റുകളും തനിക്ക് കിട്ടുന്നുണ്ടെന്നും ഈയൊരു ചോദ്യത്തിന് മറുപടി കൊടുക്കാമെന്നു കരുതുന്നെന്നും കാരണം അയാളത് ആഗ്രഹിക്കുന്നുണ്ടെന്നും മാധുരി തന്നെ വിമര്ശിച്ചയാളോടുള്ള പ്രതികരണമായി പറയുന്നു. നിങ്ങളുടെ യുക്തി നിങ്ങളുടെ കൈയില് തന്നെയിരിക്കട്ടെ. എന്റെ ശരീരത്തില് എന്ത് ഭാഗം പ്രദര്ശിപ്പിക്കണമെന്ന് ആഗ്രഹിക്കുന്നുവോ അത് ഞാന് ചെയ്യും. ഞാന് തുല്യതയിലും ബോഡി പോസിറ്റിവിറ്റിയിലും വിശ്വസിക്കുന്നൊരാളാണ്. ഒരു ആണിന് നെഞ്ച് തുറന്നിട്ട് നടക്കാമെങ്കില്, പെണ്ണിനും അങ്ങനെയാകാം. ഒരു സ്ത്രീക്ക് വയറ് കാണിക്കുന്ന രീതിയില് സാരി ധരിക്കാമെങ്കില് എനിക്കും ഇഷ്ടമുള്ള വസ്ത്രം ധരിച്ച് നടക്കാം. പുരുഷന് പൊതുസ്ഥലത്ത് മൂത്രമൊഴിക്കാമെങ്കില് സ്ത്രീക്കും അതിന് കഴിയും. തടസങ്ങള് കൂടാതെ പുരുഷന് എന്തൊക്കെ ചെയ്യാമോ അതൊക്കെ സ്ത്രീക്കും കഴിയും. സൗന്ദര്യം ഉള്ളിലാണ്. സാരിയിലല്ല. സൗന്ദര്യത്തിന്റെ കാര്യത്തില് എനിക്ക് എന്റെതായ നിലപാട് ഉണ്ട്, അതിന് എനിക്ക് നിങ്ങളുടെ അഭിപ്രായം ആവശ്യമില്ല; മാധുരി വ്യക്തമാക്കുന്നു.
ഫാഷന് ഷൂട്ടിന്റെ അടക്കമുള്ള ചിത്രങ്ങള് മാധുരി ഇന്സ്റ്റ്ഗ്രാമില് പങ്കുവച്ചിട്ടുണ്ട്. ഇവയ്ക്ക് താഴെ വരുന്ന കമന്റുകളില് പലതും നടിയെ അപമാനിക്കുന്ന തരത്തിലുള്ളതാണ്. ഇതിനെതിരെയാണ് ഇപ്പോള് മാധുരി പ്രതികരിച്ചിരിക്കുന്നത്.
വിജയകരമായി മുന്നേറുന്ന ജോസഫില് മാധുരിയുടെ പ്രകടനം എല്ലാവരും അഭിനന്ദിക്കുന്നുണ്ട്. ജോസഫിന്റെ വിജയത്തോടെ കൂടുതല് അവസരങ്ങള് മലയാളത്തില് മാധുരിയെത്തേടി എത്തുമെന്നാണ് പ്രതീക്ഷ. അനൂപ് മേനോനും മിയയും പ്രധാനവേഷങ്ങളില് എത്തിയ എന്റെ മെഴുതിരയത്താഴങ്ങള് എന്ന ചിത്രത്തിലും മാധുരി അഭിനയിച്ചിരുന്നു.