ആധുനിക ഓട്ടോമൊബൈല് വാഹങ്ങളില് കാണുന്ന എല്ലാതരം നിയന്ത്രണ സംവിധാനങ്ങളും ഒഴിവാക്കി വൈദ്യുതി ഉപയോഗിച്ച് പ്രവര്ത്തിക്കുന്ന നൂറോളം വാഹനങ്ങളുടെ പരീക്ഷണ നിര്മ്മാണം ഗൂഗിള് ആരംഭിച്ചിരിക്കുന്നു. സ്റ്റിയറിംഗ് വീല്, ഗ്യാസ് പെഡല്, ബ്രേക്, ഗിയര് ഷിഫ്റ്റ് എന്നിവ ഒഴിവാക്കിയാല് രണ്ട് സീറ്റുകളുള്ള ഈ വാഹനം ഒരു കുഞ്ഞ് മെര്സിഡസ് ബെന്സ് സ്മാര്ട് കാര് പോലിരിക്കും. ഡ്രൈവറുടെ നിയന്ത്രണത്തില് ആകെയുള്ളത് അപകട ഘട്ടങ്ങളില് വണ്ടി നിര്ത്താനുള്ള ഒരു പാനിക് ബട്ടണും വണ്ടി സ്റ്റാര്ട് ചെയ്യാനുള്ള ഒരു സ്റ്റാര്ട് ബട്ടണും മാത്രം. സ്മാര്ട് ഫോണ് ആപ്ലിക്കേഷന് വഴിയാണ് ഈ കാര് പ്രവര്ത്തിക്കുന്നത്. മനുഷ്യ സഹായമില്ലാതെ യാത്രക്കാരെ കയറ്റി സ്മാര്ട് ഫോണില് തെരഞ്ഞെടുക്കുന്ന ലക്ഷ്യ സ്ഥാനത്തെത്താന് ഈ കാറിന് കഴിയുമത്രെ.