സംഭവത്തില്‍ യൂത്ത് കോണ്‍ഗ്രസ് നേതാക്കള്‍ക്കെതിരെ എംഎല്‍എ പരാതി നല്‍കിയിട്ടുണ്ട്
നാട്ടിക എംഎല്‍എ ആയ ഗീത ഗോപി സമരം ചെയ്തിടത്ത് യൂത്ത് കോണ്‍ഗ്രസുകാര്‍ ചാണകവെള്ളം തളിച്ച് ‘ശുദ്ധം’ വരുത്തിയ നടപടിക്കെതിരെ പ്രതിഷേധം രൂക്ഷമാകുന്നു. സംഭവത്തില്‍ എംഎല്‍എ ഔദ്യോഗികമായി പരാതി നല്‍കിയിട്ടുണ്ട്. ഗീത ഗോപി എംഎല്‍ഇ ജനകീയമായി സമരം ചെയ്ത ഒരിടത്ത് ചാണകവെള്ളം തളിച്ചത് അങ്ങേയറ്റം അപമാനകരമായ സംഭവവും കുറ്റകരവുമാണെന്ന് സംസ്ഥാന ആരോഗ്യവകുപ്പ് മന്ത്രി കെ.കെ ഷൈലജ ടീച്ചര്‍ പറഞ്ഞു.
“നവോത്ഥാനത്തില്‍ ഇത്രയേറെ മുന്നിലുള്ള മലയാളികള്‍ ഇങ്ങനെ ചെയ്യാന്‍ പാടില്ല. ഇത്തരക്കാരുടെ രാഷ്ട്രീയ സംസ്‌കാരമാണ് ഇതിലൂടെ കാണിക്കുന്നത്. അയിത്ത മനസ് തിരിച്ചു വരുന്നതില്‍ ആശങ്കയുണ്ട്”, ടീച്ചര്‍ ഫേസ്ബുക്ക് കുറിപ്പിലൂടെ വ്യക്തമാക്കി.
കഴിഞ്ഞ ദിവസമാണ് റോഡിന്റെ ശോചനീയാവസ്ഥ പരിഹരിക്കാനാവശ്യപ്പെട്ട് ഗീതാ ഗോപി പഞ്ചായത്തംഗങ്ങള്‍ക്കൊപ്പം സിവില്‍ സ്റ്റേഷനു മുന്നില്‍ കുത്തിയിരുന്ന് പ്രതിഷേധിച്ചത്. പ്രതിഷേധത്തെത്തുടര്‍ന്ന് പൊതുമരാമത്ത് വകുപ്പ് നേരിട്ട് ഇടപെട്ട് അറ്റകുറ്റപ്പണികള്‍ നടത്താമെന്ന് വാഗ്ദാനവും നല്‍കിയിരുന്നു. ഇതിനു ശേഷമാണ് ദളിത് സമുദായാംഗം കൂടിയായ ഗീതാ ഗോപി ഇരുന്നു പ്രതിഷേധിച്ചയിടത്ത് യൂത്ത് കോണ്‍ഗ്രസ് പ്രവര്‍ത്തകരും ചേര്‍പ്പ് പഞ്ചായത്ത് പ്രസിഡന്റ് വിനോദ് കുമാറും ചേര്‍ന്ന് ചാണക വെള്ളം തളിച്ചത്. ഇതിനെ യൂത്ത് കോണ്‍ഗ്രസ് നേതാക്കള്‍ പിന്നീട് ന്യായീകരിക്കുകയും ചെയ്തിരുന്നു.
നിയമസഭാ സാമാജികയായ തനിക്ക് ഇത്രയേറെ കടുത്ത ജാതീയത നേരിടേണ്ടിവരുന്നുണ്ടെങ്കില്‍, സാധാരണക്കാരായ പട്ടികജാതിക്കാര്‍ക്കു നേരെ എന്തു തരത്തിലുള്ള അതിക്രമങ്ങള്‍ക്കും ഇവര്‍ മടിക്കുകയില്ലെന്നും, അതിനെതിരായി സാധ്യമായ എല്ലാ നടപടികളും സ്വീകരിക്കുമെന്നും ഗീതാ ഗോപി എംഎല്‍എ അഴിമുഖത്തോട് പ്രതികരിച്ചു.
ഗീത ഗോപി എംഎല്‍എയുടെ പ്രതികരണം
“നാട്ടിക നിയമസഭയെ കഴിഞ്ഞ എട്ടു വര്‍ഷമായി പ്രതിനിധീകരിക്കുന്നയാളാണ് ഞാന്‍. മണ്ഡലത്തിനകത്ത് ഒരുപാട് പൊതുവിഷയങ്ങളുണ്ട്. ഒരു സാമാജിക എന്ന നിലയില്‍ അതില്‍ ഇടപെടുന്നതും ഉദ്യോഗസ്ഥരുമായി സംസാരിച്ച് പരിഹരിക്കുന്നതും സാധാരണ വിഷയമാണ്. ഇന്നലെ നടന്നത് പക്ഷേ, അസ്വാഭാവികമായ കാര്യമായിരുന്നു. റോഡില്‍ അപകട സാധ്യത കാണുകയും, ജനങ്ങള്‍ പ്രതിഷേധിക്കുകയും അതിനു പരിഹാരമുണ്ടാക്കാന്‍ എംഎല്‍എ എന്ന നിലയില്‍ സിവില്‍ സ്റ്റേഷനു മുന്നില്‍ കുത്തിയിരിക്കേണ്ടിവരികയുമാണ് ചെയ്തത്. ജില്ലാ പഞ്ചായത്ത് പ്രസിഡന്റ്, മെംബര്‍മാര്‍ എന്നിവരുടെ സാന്നിധ്യത്തില്‍ മണിക്കൂറുകളോളമാണ് ഞാന്‍ സിവില്‍ സ്റ്റേഷനു മുന്നിലിരുന്നത്. അപ്പോള്‍ത്തന്നെ പ്രശ്നം മന്ത്രിയുടെ ഓഫീസില്‍ നിന്നും ഇടപെട്ട് പരിഹരിച്ചു. റോഡിലെ കുഴികളടച്ച് ഗതാഗത സൗകര്യം പുനസ്ഥാപിക്കാനുള്ള ഉറപ്പ് കിട്ടിയ ശേഷമാണ് ഞാന്‍ സമരം അവസാനിപ്പിച്ചത്. ഞാനും മെമ്പര്‍മാരും ഇരുന്നു പ്രതിഷേധിച്ച അതേയിടത്ത് ചേര്‍പ്പ് ഗ്രാമപഞ്ചായത്ത് പ്രസിഡന്റ് വിനോദും യൂത്ത് കോണ്‍ഗ്രസും ചേര്‍ന്ന് ബക്കറ്റും ചാണകവും വെള്ളവുമായി അടിച്ചു കഴുകുന്ന രംഗമാണ് ഞാന്‍ പിന്നെ സമൂഹമാധ്യമങ്ങള്‍ വഴി കാണുന്നത്.
സത്യത്തില്‍ ഞാനതു കണ്ട് ഞെട്ടിപ്പോയി. കേരള സംസ്ഥാനത്ത് ഇങ്ങനെ ഇനി നടക്കാന്‍ പാടില്ല എന്ന് അപ്പോള്‍ത്തന്നെ മനസ്സില്‍ ഉറപ്പിക്കുകയും ചെയ്തു. വളരെ വേദനാജനകമായ ഒരു വിഷയമാണത്. നിയമസഭാംഗവും പട്ടികജാതിക്കാരിയുമായ എനിക്ക് ഇന്ന് ഇത് സംഭവിച്ചിട്ടുണ്ടെങ്കില്‍, നാളെ മറ്റു പല സ്ത്രീകള്‍ക്കും ഇത് അനുഭവിക്കേണ്ടി വന്നേക്കാം. ഒരിക്കലും അതുണ്ടാകരുത്. ആ തീര്‍ച്ചയുടെ പുറത്ത് പാര്‍ട്ടി നേതൃത്വത്തെ വിവരമറിയിച്ചിട്ടുണ്ട്. അവരുമായി കൂടിയാലോചിച്ച് സാധ്യമായിടത്തെല്ലാം പരാതികളും കൊടുത്തിട്ടുണ്ട്. കേരളത്തിന്റെ മതനിരപേക്ഷത കാത്തുസൂക്ഷിക്കുന്ന ഈ സര്‍ക്കാരിന്റെ ഒരു എംഎല്‍എയ്ക്ക് ഇങ്ങനെ സംഭവിക്കാന്‍ പാടില്ല എന്നാണ് എന്റെ പരാതികളുടെ ഉള്ളടക്കം. അക്കാര്യത്തില്‍ മുഖ്യമന്ത്രി എനിക്ക് പൂര്‍ണ പിന്തുണ നല്‍കുമെന്ന വിശ്വാസവുമുണ്ട്. ഏറ്റവും അപഹാസ്യമായ കാര്യമാണ് ഇന്നലെ സംഭവിച്ചത്. മനുഷ്യനായി ജീവിക്കാനുള്ള സ്വാതന്ത്ര്യം ഇവിടെയാര്‍ക്കുമില്ലേ? ആ സ്വാതന്ത്ര്യം ജനങ്ങള്‍ക്ക് ഉറപ്പുവരുത്താനുള്ള ജനാധിപത്യ വ്യവസ്ഥയിലെ ഒരു സാമാജികയ്ക്കാണ് ഇന്നിത് സംഭവിച്ചിരിക്കുന്നത്. അങ്ങനെയുണ്ടായ സ്ഥിതിക്ക് നാളെ സാധാരണ ജനങ്ങള്‍ക്ക് എന്തെല്ലാം സംഭവിച്ചേക്കാം? അതാണ് എന്റെ വിഷയം. നാളെയിവര്‍ പട്ടികജാതിക്കാര്‍ നടക്കുന്ന വഴിയിലെല്ലാം പുറകെ നടന്ന് ചാണകവെള്ളം തളിച്ചാല്‍ എന്തു ചെയ്യാന്‍ പറ്റും? യുവാക്കള്‍ക്ക് ഇതാണ് അന്തസ്സ് എന്നല്ലേ അവര്‍ ഈ പ്രവൃത്തിയിലൂടെ പറഞ്ഞുവയ്ക്കുന്നത്?”.
Also Read: ചാണകവെള്ളം തളിച്ച് ‘ശുദ്ധ’മാക്കിയതിനെ ന്യായീകരിച്ച് യൂത്ത് കോണ്‍ഗ്രസുകാര്‍
യൂത്ത് കോണ്‍ഗ്രസ് നേതാക്കളുടെ പ്രതികരണം
അതേ സമയം, എംഎല്‍എ ചീപ് പബ്ലിസിറ്റിക്ക് വേണ്ടി ശ്രമിക്കുകയാണെന്നാണ് യൂത്ത് കോണ്‍ഗ്രസ് നേതാക്കളുടെ ആരോപണം. ജാതീയമായി അധിക്ഷേപിക്കാനാല്ല സമരം നടത്തിയത്. ചേര്‍പ്പ് തൃപ്പയാര്‍ റോഡിന്റെ ശോച്യാവസ്ഥ പരിഹരിക്കാതെ സമരനാടകം കളിച്ച എംഎല്‍എക്കെതിരെ പ്രതിഷേധിക്കുകയാണ് കോണ്‍ഗ്രസ് ചെയ്തതെന്ന് യൂത്ത് കോണ്‍ഗ്രസ് ചേര്‍പ്പ് മണ്ഡലം പ്രസിഡന്റ് സുജിത്ത് കുമാര്‍ പറഞ്ഞു. ചാണകവെള്ളം അശുദ്ധി ഒഴിവാക്കുമെന്നും അതുപയോഗിച്ചാല്‍ ജാതി അധിക്ഷേപമാകുമോ എന്നും നിയമത്തില്‍ പറയുന്നുണ്ടോ എന്നും അദ്ദേഹം ചോദിച്ചു. സംഭവത്തെക്കുറിച്ച് പ്രതികരണം ആരാഞ്ഞ അഴിമുഖത്തോടായിരുന്നു അദ്ദേഹത്തിന്റെ പ്രതികരണം. ചാണക വെള്ളം തളിക്കാന്‍ നേതൃത്വം നല്‍കിയവരിലൊരാളാണ് സുജിത്.
“പ്രശ്നം വഴിതിരിച്ചു വിടാനുള്ള ശ്രമമാണ് ഇപ്പോള്‍ നടക്കുന്നത്. എംഎല്‍എ നടത്തിയ സമരനാടകത്തിനെ പൊളിക്കുകയാണ് യൂത്ത് കോണ്‍ഗ്രസ് ചെയ്തത്. നാട്ടുകാര്‍ തടഞ്ഞുവച്ചപ്പോള്‍ രക്ഷപെടാന്‍ വേണ്ടിയാണ് സിവില്‍ സ്റ്റേഷനില്‍ വന്ന് കുത്തിയിരുന്നത്. ഈ നാടകം അനുവദിക്കില്ല എന്നു പറഞ്ഞുകൊണ്ടാണ് യൂത്ത് കോണ്‍ഗ്രസ് സിവില്‍ സ്റ്റേഷനിലേക്ക് മാര്‍ച്ച് നടത്തിയത്. പക്ഷേ അപ്പോഴേക്കും എംഎല്‍എ സ്ഥലം വിട്ടു. ഒരിക്കലും ജാതി പറഞ്ഞ് അധിക്ഷേപിച്ചുള്ള സമരം യൂത്ത് കോണ്‍ഗ്രസ് നടത്തില്ല. യൂത്ത് കോണ്‍ഗ്രസിന് അത്തരമൊരു പാരമ്പര്യവുമില്ല. ഈ സമരത്തിന് നേതൃത്വം നല്‍കിയത് ദളിതനായ ഞങ്ങളുടെ പഞ്ചായത്ത് പ്രസിഡന്റ് സി.കെ വിനോദാണെന്നും ഓര്‍ക്കണം. മറ്റൊരു രീതിയില്‍ വളച്ചൊടിച്ച് പബ്ലിസിറ്റിയുണ്ടാക്കാനാണ് എംഎല്‍എ ശ്രമിക്കുന്നത്. ചാണകവെള്ളം അശുദ്ധിയൊഴിവാക്കുമെന്നും അതുപയോഗിച്ചാല്‍ ജാതീയമായ അധിക്ഷേപമാണെന്നും നിയമത്തില്‍ എവിടെയെങ്കിലും പറയുന്നുണ്ടോ എന്നെനിക്കറിയില്ല. വിശ്വാസങ്ങളില്ലാത്ത കമ്മ്യൂണിസ്റ്റ് പാര്‍ട്ടിയാണോ ജാതിവാദം പറയുന്നത്? ചീപ്പ് പബ്ലിസിറ്റിക്കു വേണ്ടി ശ്രമിക്കുകയാണവര്‍”, സുജിത്ത് കുമാര്‍ പറഞ്ഞു.
കെ.കെ ശൈലജ ടീച്ചറിന്റെ ഫേസ്ബുക്ക് പോസ്റ്റ്‌
“ഗീത ഗോപി എം.എല്‍.എ.യ്‌ക്കെതിരെ ജാതീയ അധിക്ഷേപം ഉണ്ടായ സംഭവം ഞെട്ടിപ്പിക്കുന്നതാണ്. ഒരു എം.എല്‍.എ. ആയിട്ടു പോലും ഇതാണ് സംഭവിച്ചിരിക്കുന്നത്. ജനകീയമായി സമരം ചെയ്ത സ്ഥലത്ത് യൂത്ത് കോണ്‍ഗ്രസുകാര്‍ ചാണകവെള്ളം തളിച്ചത് അങ്ങേയറ്റം അപമാനകരമായ സംഭവവും കുറ്റകരവുമാണ്. നവോത്ഥാനത്തില്‍ ഇത്രയേറെ മുന്നിലുള്ള മലയാളികള്‍ ഇങ്ങനെ ചെയ്യാന്‍ പാടില്ല. ഇത്തരക്കാരുടെ രാഷ്ട്രീയ സംസ്‌കാരമാണ് ഇതിലൂടെ കാണിക്കുന്നത്. അയിത്ത മനസ് തിരിച്ചു വരുന്നതില്‍ ആശങ്കയുണ്ട്. ഇതിനെതിരെ ശക്തമായി അപലപിക്കുന്നു. ഇവര്‍ക്കെതിരെ കര്‍ശന നടപടി സ്വീകരിക്കണം.”
