പുരസ്‌കാരം നേടിയ ഓള്‍ഗയുടെ ഫ്ളൈറ്റ്സ് എന്ന നോവല്‍ എക്സ്ട്രാ ഓര്‍ഡിനറി ഫ്‌ളൈറ്റ് ആണെന്ന് ജൂറി
മാന്‍ ബുക്കര്‍ പുരസ്‌കാരം നേടുന്ന ആദ്യത്തെ പോളിഷ് സാഹിത്യകാരിയായി ഓള്‍ഗ ടോക്കന്‍ചുക്ക്. ‘ഫ്ളൈറ്റ്സ്’ എന്ന നോവലാണ് ഓള്‍ഗയെ പുരസ്‌കാരത്തിന് അര്‍ഹയാക്കിയത്. നൂറിലധികം നോവലുകളാണ് ഈ വര്‍ഷത്തെ മാന്‍ ബുക്കറിനായി പരിഗണിച്ചത്. അതില്‍ നിന്നെല്ലാം ഫിക്ഷന്‍ നോവലായ ഫ്ളൈറ്റ്സിനെ എക്സ്ട്രാ ഓര്‍ഡിനറി ഫ്ളൈറ്റ്സ് എന്ന വിശേഷണം നല്‍കിയാണ് ജൂറി തിരഞ്ഞെടുത്തത്. 1990-കളില്‍ സാഹിത്യരംഗത്തെത്തിയ ടോക്കര്‍ചുക്കിന് ഒട്ടേറെ ദേശീയ, അന്താരാഷ്ട്ര പുരസ്‌കാരങ്ങള്‍ ലഭിച്ചിട്ടുണ്ട്. പോളണ്ടിലെ ഏറ്റവും ജനപ്രിയ എഴുത്തുകാരില്‍ ഒരാള്‍ കൂടി ആണ് ഓള്‍ഗ.
2005-ലാണ് മാന്‍ ബുക്കര്‍ അന്താരാഷ്ട്ര സമ്മാനം ഏര്‍പ്പെടുത്തിയത്. ഇംഗ്ലീഷിലേക്ക് പരിഭാഷപ്പെടുത്തിയതും ബ്രിട്ടനില്‍ പ്രസിദ്ധീകരിച്ചതുമായ കൃതികള്‍ക്കാണ് പുരസ്‌കാരം നല്‍കുന്നത്. സമ്മാനത്തുകയായ 67,000 ഡോളര്‍ (50,000 പൗണ്ട്) പുസ്തകത്തിന്റെ പരിഭാഷക ജെന്നിഫര്‍ ക്രോഫ്റ്റുമായി ടോക്കര്‍ചുക് പങ്കിട്ടു.
