നികുതി ഇളവ് നല്‍കുന്നതിലൂടെ സംസ്ഥാനത്തിന് 500 കോടിയുടെ നഷ്ടം നേരിടുമെന്നാണ് വിലയിരുത്തല്‍
സംസ്ഥാനത്തെ ഇന്ധന വില വര്‍ധനയില്‍ ഇളവു നല്‍കാന്‍ മന്ത്രിസഭാ യോഗ തീരുമാനം. ഇതിനായി എക്‌സൈസ് നികുതിയില്‍ കുറവു വരുത്താനും യോഗം തീരുമാനിച്ചു. ഇതോടെ ജുണ്‍ ഒന്നു മുതല്‍ സംസ്ഥാനത്തെ പെട്രോള്‍ ഡീസല്‍ വിലയില്‍ ഒരു രൂപയോളം കുറവ് വരും. പതിനഞ്ച് ദിവസത്തിന് ശേഷം വില വീണ്ടും പുനഃപരിശോധിക്കുമെന്നും മന്ത്രിസഭാ യോഗം അറിയിച്ചു. നികുതി ഇളവ് നല്‍കുന്നതിലൂടെ സംസ്ഥാനത്തിന് 500 കോടിയുടെ നഷ്ടം നേരിടുമെന്നാണ് വിലയിരുത്തല്‍.
അതേസമയം പെട്രോള്‍, ഡീസല്‍ വിലയില്‍ കഴിഞ്ഞ 16 ദിവസത്തിന് ശേഷം ഇന്ന് ഒരു പൈസയുടെ കുറവ് രേഖപ്പെടുത്തി. പൊതുമേഖല എണ്ണകമ്പനിയായ ഇന്ത്യന്‍ ഓയില്‍ കോര്‍പറേഷന്‍ വെബ്‌സൈറ്റ് പ്രകാരം പെട്രോള്‍ വിലയില്‍ 60 പൈസയും ഡീസല്‍ വിലയും 59 പൈസയും കുറച്ചെന്നായിരുന്നു രാവിലെ അറിയിച്ചത്. എന്നാല്‍ ഇത് തെറ്റു പറ്റിയതാണെന്നും യഥാര്‍ഥത്തില്‍ ഒരു പൈസ മാത്രമാണ് കുറഞ്ഞിട്ടുള്ളതെന്നും കമ്പനി പിന്നീട് പ്രതികരിച്ചു.
