സംഭവം നടന്ന് രണ്ട് മണിക്കൂറിന് ശേഷമാണ് തെരച്ചിലിന് കോസ്റ്റ് ഗാര്ഡിന്റെ ബോട്ട് എത്തിയത്. ഇതിനെതിരെ നാട്ടുകാരുടെ പ്രതിഷേധം ഉയര്ന്നിരുന്നു.
തിരുവനന്തപുരം ശംഖുമുഖത്ത് കടലില് ചാടി ആത്മഹത്യ ചെയ്യാന് ശ്രമിച്ച പെണ്കുട്ടിയെ രക്ഷിക്കുന്നതിനിടെ തിരയില്പ്പെട്ട് കാണാതായ ലൈഫ് ഗാര്ഡിന്റെ മൃതദേഹം കണ്ടെത്തി. ചെറിയതുറ സ്വദേശി ജോണ്സണ് ഗബ്രിയേലിന്റെ മൃതദേഹമാണ് തെരച്ചിലിനൊടുവില് വലിയതുറ തീരത്തുനിന്ന് കണ്ടെത്തിയത്.
ഈ മാസം 21ന് കടലില് ചാടിയ പെണ്കുട്ടിയെ രക്ഷിക്കുന്നതിനിടെ ജോണ്സനെ തിരയില്പ്പെട്ട് കാണാതാവുകയായിരുന്നു. പെണ്കുട്ടി കടലില് ചാടുന്നത് കണ്ട് രക്ഷിക്കാന് ജോണ്സണ് കടലിലേക്ക് ഓടിയിറങ്ങുകയായിരുന്നു. ഒപ്പമുണ്ടായിരുന്ന ലൈഫ് ഗാര്ഡുമാരുടെ സഹായത്തോടെ പെണ്കുട്ടിയെ രക്ഷിച്ചു കരയില് എത്തിച്ചെങ്കിലും ശക്തമായ തിരയില്പ്പെട്ട് ജോണ്സന് ബോധം നഷ്ടമായി. തുടര്ന്ന് ജോണ്സനെ കാണാതാവുകയായിരുന്നു.
സംഭവം നടന്ന് രണ്ട് മണിക്കൂറിന് ശേഷമാണ് തെരച്ചിലിന് കോസ്റ്റ് ഗാര്ഡിന്റെ ബോട്ട് എത്തിയത്. ഇതിനെതിരെ നാട്ടുകാരുടെ പ്രതിഷേധം ഉയര്ന്നിരുന്നു. ശക്തമായ കടലാക്രമണത്തെ തുടര്ന്ന് ശംഖുമുഖത്ത് വലിയതോതില് തീരശോഷണം സംഭവിച്ചിട്ടുണ്ട്. ഇതേത്തുടര്ന്ന് ഈ ഭാഗത്ത് അപകട സാധ്യതയുണ്ടെന്ന റിപ്പോര്ട്ടിനെത്തുടര്ന്നാണ് സന്ദര്ശകര്ക്ക് നിയന്ത്രണം ഏര്പ്പെടുത്തിയിരുന്നു.