സമൂഹത്തിന് വെളിച്ചം പകര്ന്ന അധ്യാപകരിലൊരാളെയാണ് നഷ്ടപ്പെട്ടിരിക്കുന്നതെന്ന് എംവി ജയരാജ്
പ്രമുഖ നാടക പ്രവര്ത്തകനും പു.ക.സ സംസ്ഥാന മെമ്പറുമായ ഒ. കെ. കുറ്റിക്കോല് (ഒ. കരുണന് കുറ്റിക്കോല്-74) അന്തരിച്ചു. ചെറിയൂര് ഗവ യുപി സ്കൂള് റിട്ട. പ്രധാന അധ്യാപകനായിരുന്ന കുറ്റിക്കോല്, ദേശിയ അധ്യാപക അവാര്ഡ് ജേതാവുമാണ്. നാടന് കലാ അക്കാദമി പ്രവര്ത്തക സമിതി അംഗം, സംഗീത നാടക അക്കാദമി അംഗം, കണ്ണൂര് സംഘചേതന സ്ഥാപക ഭാരവാഹി എന്നീ നിലകളില് പ്രവര്ത്തിച്ചിരുന്നു. ഭാര്യ: നാരായണി. മക്കള്: രഞ്ജിത്ത്, റീഷ, റീത്ത. മരുമക്കള്: സുരേഷ് ബാബു, പവിത്രന്, ബേബി ശബ്നം.
സമൂഹത്തിന് വെളിച്ചം പകര്ന്ന അധ്യാപകരിലൊരാളെയാണ് നഷ്ടപ്പെട്ടിരിക്കുന്നതെന്ന് സിപിഎം ജില്ലാസെക്രട്ടറി എംവി ജയരാജ് കുറ്റിക്കോലിന്റെ മരണത്തില് അനുശോചിച്ചു. എം വി ജയരാജ് ഫെയ്സ്ബുക്കില് കുറിച്ചത്-
‘നഷ്ടമായത് നാടക-പൊതുവേദികളിലെ മനുഷ്യപക്ഷ പോരാളിയെ..
പുരോഗമന കലാ-സാഹിത്യ സംഘം സംസ്ഥാന സമിതിയംഗവും ദേശീയ അധ്യാപക പുരസ്ക്കാര ജേതാവുമായ സ. ഒ കെ കുറ്റിക്കോല് മാഷിന്റെ ആകസ്മിക വേര്പാടില് ദു:ഖം രേഖപ്പെടുത്തുന്നു. സമൂഹത്തിന് വെളിച്ചം പകര്ന്ന അധ്യാപകരിലൊരാളെയാണ് അദ്ദേഹത്തിന്റെ നിര്യാണത്തോടെ നഷ്ടമായിരിക്കുന്നത്. കണ്ണൂര് സംഘചേതനയുടെ തുടക്കം മുതല് അതിന്റെ അമരക്കാരിലൊരാളായി ഒ.കെ യുണ്ടായിരുന്നു. സാധാരണക്കാരന്റെ ജീവിതവും ആകുലതകളും ആ അധ്യാപകനെ, കലാകാരനെ എപ്പോഴും അലട്ടിക്കൊണ്ടിരുന്നതായി സംഘചേതനയുടെ ഭാഗമായി ഒരുമിച്ച് പ്രവര്ത്തിക്കുമ്പോള് നേരിട്ട് മനസ്സിലാക്കാന് സാധിച്ചിട്ടുണ്ട്. നാടകവേദിയിലും പൊതുവേദിയിലും അദ്ദേഹം നടത്തിയത് ആ മനുഷ്യപക്ഷ പോരാട്ടം തന്നെയായിരുന്നു. പ്രിയസഖാവിന്റെ വേര്പാടില് അനുശോചിക്കുന്നു.’