സര്‍ക്കാരിന്റെ ക്യാമ്പുകളിലെത്തിയത് 1,11000 കുടുംബങ്ങളാണ്.
പ്രളയത്തിലും ദുരന്തത്തിലും ദുരിതാശ്വാസ ക്യാമ്പുകളിലെ കഴിയേണ്ടി വന്ന കുടുംബങ്ങള്‍ക്ക് ഫീല്‍ഡ് പരിശോധന നടത്താതെ തന്നെ അടിയന്തര സഹായമായി പതിനായിരം രൂപ വീതം ലഭിക്കും. ഓണത്തിന് മുമ്പ് എല്ലാ കുടുംബങ്ങള്‍ക്കും അടിയന്തര സഹായം നല്‍കാനാണ് റവന്യൂ വകുപ്പിന്റെ ശുപാര്‍ശ. സെപ്റ്റംബര്‍ ഏഴിനകം അര്‍ഹരായ എല്ലാവര്‍ക്കും സഹായം നല്‍കണമെന്നാണ് അറിയിച്ചിരിക്കുന്നത്. ആയിരം വില്ലേജുകളെ പ്രളയബാധിത വില്ലേജുകളായി പ്രഖ്യാപിക്കാനും റവന്യൂ വകുപ്പ് നിര്‍ദേശം നല്‍കിയിട്ടുണ്ട്.
ഇത്തവണ വില്ലേജ് ഓഫീസറും പഞ്ചായത്ത് സെക്രട്ടറിയും അടങ്ങുന്ന സംഘം ഫീല്‍ഡ് പരിശോധന നടത്തി അര്‍ഹത ഉറപ്പാക്കിയ ശേഷം സഹായം നല്‍കിയാല്‍ മതിയെന്നായിരുന്നു സര്‍ക്കാര്‍ തീരുമാനം. പ്രളയബാധിതരായ കുടുംബങ്ങള്‍ക്ക് 10000 രൂപ വീതം അടിയന്തര സഹായം നല്‍കാന്‍ മന്ത്രിസഭാ യോഗം തീരുമാനിച്ചിരുന്നുവെങ്കിലും കഴിഞ്ഞ വര്‍ഷം അനര്‍ഹരായവര്‍ പണം കൈപ്പറ്റിയ പശ്ചാത്തലത്തിലായിരുന്നു ഇത്.
എന്നാല്‍ സൂക്ഷ്മ പരിശോധന നടത്താന്‍ ഏറെ സമയം വേണ്ടി വരുമെന്നതിനാലാണ് ക്യാമ്പുകളില്‍ കഴിഞ്ഞ കുടുംബങ്ങള്‍ക്ക് മുന്‍ഗണന നല്‍കാന്‍ റവന്യുവകുപ്പ് തീരുമാനിച്ചത്. സര്‍ക്കാരിന്റെ ക്യാമ്പുകളിലെത്തിയത് 1,11000 കുടുംബങ്ങളാണ്. ഇവര്‍ക്ക് ഉടനടി പതിനായിരം രൂപ വീതം സഹായം ലഭികും.
അതേസമയം പ്രളയത്തെത്തുടര്‍ന്ന് ബന്ധുവീടുകളിലേക്ക് മാറുകയോ സര്‍ക്കാര്‍ ക്യാമ്പിലെത്താതിരിക്കുകയോ ചെയ്തവര്‍ക്ക് ഫീല്‍ഡ് തല പരിശോധന നടത്തിയ ശേഷമാകും സഹായം നല്‍കുക. 48 മണിക്കൂര്‍ വീട്ടില്‍ വെളളം കെട്ടി നിന്നവര്‍ക്കും സഹായത്തിന് അര്‍ഹതയുണ്ട്.
