നെഹ്റു കോളേജില് ഷൂട്ടിംഗിന് എത്തിയപ്പോള് ഉണ്ടായ അനുഭവം വിവരിച്ച് നടി മാല പാര്വ്വതി
നെഹ്റു കോളേജില് ഷൂട്ടിംഗിനായി പോയപ്പോള് തനിക്കുണ്ടായ ഒരു അനുഭവം അസ്വസ്ഥതയുണ്ടാക്കിയിരുന്നുവെന്നും ഇന്ന് ആ അസ്വസ്ഥത ഉറക്കം കെടുത്തുന്നുവെന്നും നടിയും സാമൂഹ്യ പ്രവര്ത്തകയുമായ മാല പാര്വ്വതി. താന് ധരിച്ചുവെച്ചിരുന്നത് പാലക്കാട് ലക്കിടിക്കടുത്തുള്ള നെഹ്റു കോളേജില് നിന്നായിരുന്നു ആ അനുഭവമെന്നായിരുന്നുവെന്നാണ്. ഇന്ന് വിവാദമുണ്ടായിരിക്കുന്ന അതേ പാമ്പാടി കോളേജില് നിന്നായിരുന്നു ആ അസ്വസ്ഥപ്പെടുത്തുന്ന അനുഭവം ഉണ്ടായതെന്ന് വൈകിയാണ് മനസിലായതെന്നും പാര്വ്വതി പറയുന്നു. തന്റെ ഫെയ്സ്ബുക്ക് പോസ്റ്റിലൂടെയാണ് പാര്വ്വതിയുടെ വെളിപ്പെടുത്തല്.
പാര്വ്വതിയുടെ ഫെയ്സ്ബുക്ക് പോസ്റ്റ്-
‘രാജേഷ് നായര് സംവിധാനം ചെയ്ത സാള്ട്ട് മാംഗോ ട്രീ എന്ന ചിത്രത്തിന്റെ ഷൂട്ടിംഗിനാണ് പാലക്കാട് ലക്കിടിക്കുത്തുള്ള Nehru College of Engineering -ല് പോയത്. ബിജു മേനോനെ ഇന്റര്വ്യൂ ചെയ്യുന്ന പ്രശസ്തമായ രംഗം അവിടെ വെച്ചാണ് ചിത്രീകരിച്ചത്.
ആ ഷൂട്ടിംഗിന് പോയപ്പോള് ഡ്രസ് മാറാനുള്ള റൂം കിട്ടുന്നത് വരെ പുറത്ത് കാറില് കാത്തിരുന സമയത്ത് എന്റെ കണ്ണില് പെട്ട ഒരു രംഗമുണ്ട്’.
ഒരു വിദ്യാര്ത്ഥി, 19 – 20 വയസ്സ് പ്രായം തോന്നിക്കും. Gate-ലെ സെക്യുരിറ്റി ഗാര്ഡിനോട് കെഞ്ചുകയാണ് അകത്തേക്ക് കയറ്റി വിടാ. അയാള് നിഷ്കരുണം ‘ഇല്ല’ എന്ന് പറയുന്നു. ഞാന് കാര്യമറിയാന് അവരുടെ അടുത്തേക്ക് നടന്നു. കേട്ടതിതാണ് ….’ ചേട്ടാ ചേട്ടാ – പ്ലീസ് ചേട്ടാ.. ഞാന് ഇന്നലെയും കൂടി താടി വടിച്ചതാണ്. ഇന്ന് അസൈന്മെന്റ് വച്ചില്ലെങ്കില് ഫൈന് ഉണ്ട്- പ്ലീസ് ചേട്ടാ പ്ലീസ്.’ മുഖത്ത് താടി ഉണ്ടെങ്കില് കയറ്റി വിടാന് നിവൃത്തിയില്ല എന്ന് അയാള് . അവസാനം നിവര്ത്തിയില്ലാതെ കുറേ നേരം നിന്ന് ആ വിദ്യാര്ത്ഥി മടങ്ങി.
പിന്നീട് അദ്ധ്യാപകര് വിസിറ്റേഴ്സ് ബുക്കില് എഴുതാന് പറഞ്ഞപ്പോള് കുട്ടികളോട് ഇങ്ങനെ പെരുമാറുന്ന സ്ഥാപനത്തിലെ ബുക്കില് ഞാന് എഴുതില്ല എന്ന് പറഞ്ഞു – അല്ലെങ്കില് മേല് വിവരിച്ചത് എഴുതാം എന്നും പറഞ്ഞു, ‘അയ്യോ, അതു വേണ്ട എന്നായി അവര് ! അദ്ധ്യാപകന്റെ മുഖത്ത് താടി ഉണ്ടല്ലോ എന്ന് ചോദിച്ചപ്പോള് ‘ഓരോ നിയമങ്ങള് അല്ലേ’ എന്നായിരുന്നു മറുപടി.
ഷൂട്ടിംഗിന് പോയ നെഹ്റു കോളജ്, ജിഷ്ണു പഠിച്ചിരുന്ന, വിവാദം നടക്കുന്ന അതേ കോളജ് ആണെന്ന് തിരിച്ചറിഞ്ഞത് വൈകിയാണ്. പാമ്പാടി എന്നല്ല, ലക്കിടിയില് ആണ് ആ കോളജ് എന്നാണ് ഞാന് മനസ്സിലാക്കിയിരുന്നത്.
ഒരു പാട് കുട്ടികള് പഠിച്ചിട്ടും ഭയാനകമായ മൗനം തളം കെട്ടി നിന്ന ആ കാംപസ് എന്നെ അന്ന് വല്ലാതെ അസ്വസ്ഥമാക്കിയിരുന്നു. ഇന്ന് ആ അസ്വസ്ഥത ഉറക്കം കെടുത്തുന്നു… ഡിസിപ്ലിന്റെ പേരില് ശ്വാസം മുട്ടിക്കുന്ന പല കോളേജുകളിലെയും കുഞ്ഞുങ്ങളുടെ കഴുത്തിലെ കെട്ട് എപ്പോള് വേണമെങ്കിലും വീണ്ടും മുറുകാം.
ഒരു പാട് പഠിച്ച് കുട്ടികൾ മടങ്ങി എത്തുന്നത് വെള്ള തുണിയിൽ പൊതിഞ്ഞാകാതിരിക്കട്ടെ!’
