തൊഴിലില്ലങ്കില്‍ പക്കോഡ വിറ്റ് ജീവിക്കൂവെന്നാണ് നരേന്ദ്ര മോദി ഒരു റാലിയില്‍ പ്രസംഗിച്ചത്
പ്രധാനമന്ത്രി നരേന്ദ്ര മോദിയുടെ ജീവിതത്തെ ആസ്പദമാക്കിയുള്ള ചിത്രം ഒരുങ്ങുന്നുവെന്നാണ് ബോളീവുഡില്‍ നിന്നും വരുന്ന പുതിയ വാര്‍ത്ത. മോദിയായി വിവേക് ഒബ്രോയി വേഷമിടുന്നുവെന്നും വാര്‍ത്തകളുണ്ട്. ഏറെ കാലമായി സിനിമകളിലൊന്നും വിവേക് ഒബ്രോയി പ്രത്യക്ഷപ്പെടുന്നില്ല. മോദിയായി അഭിനയിക്കാനൊരുങ്ങുന്ന ഒബ്രോയിയെ പരിഹസിക്കുകയാണ് സോഷ്യല്‍ മീഡിയ.
തന്റെ പുതിയ ചിത്രത്തില്‍ നരേന്ദ്ര മോദിയായി അഭിനയിക്കാനുള്ള എല്ലാ തയ്യാറെടുപ്പുകളും വിവേക് ഒബ്രോയി നടത്തിക്കഴിഞ്ഞെന്നാണ് സുപാരിമാന്‍ എന്ന പ്രൊഫൈലില്‍ പറയുന്നത്. എന്നാല്‍ തൊഴില്‍രഹിതര്‍ക്ക് മോദിജി തൊഴില്‍ നല്‍കുന്നില്ലെന്ന് അദ്ദേഹത്തെ എതിര്‍ക്കുന്നവര്‍ക്ക് പറയാനാകുമോയെന്നാണ് ഇയാളുടെ പരിഹാസം. ഈ ട്വീറ്റിന്റെ സ്‌ക്രീന്‍ ഷോട്ട് എടുത്ത് പരിഹസിക്കുന്നത് മുതിര്‍ന്ന സുപ്രിംകോടതി അഭിഭാഷകനായ പ്രശാന്ത് ഭൂഷണ്‍ ആണ്. ‘വിവേക് ഒബ്രോയി(ഇദ്ദേഹത്തെ അടുത്ത കാലത്ത് ആരെങ്കിലും ഏതെങ്കിലും സിനിമയില്‍ കണ്ടിട്ടുണ്ടോ?) തന്റെ പുതിയ സിനിമയില്‍ മോദിയായി അഭിനയിക്കുന്നു. പക്കോഡ വില്‍ക്കുന്നതിലും നല്ല ജോലിയാണ് എന്തായാലും ഇത്’ എന്നായിരുന്നു പ്രശാന്ത് ഭൂഷണിന്റെ ട്വീറ്റ്.
തൊഴിലില്ലങ്കില്‍ പക്കോഡ വിറ്റ് ജീവിക്കൂവെന്നാണ് നരേന്ദ്ര മോദി ഒരു റാലിയില്‍ പ്രസംഗിച്ചത്. പക്കോഡ വില്‍ക്കുന്നവര്‍ ദിവസം 200 രൂപ സമ്പാദിക്കുന്നുണ്ടെന്നും അതിനാല്‍ അവരെ തൊഴിലില്ലാത്തവരായി കാണാനാകില്ലെന്നുമായിരുന്നു പ്രധാനമന്ത്രിയുടെ പ്രസംഗം.
