വിവാഹച്ചടങ്ങിന് മോടികൂട്ടാന് വരൻ ആനപ്പുറത്ത് എഴുന്നെള്ളിയ സംഭവത്തിൽ പോലീസ് കേസെടുത്തു. വടകരയിലാണ് സംഭവം. നാട്ടാന പരിപാലന ചട്ടം അനുസരിച്ചാണ് കേസ് എടുത്തിരിക്കുന്നത്. വടകര വില്യാപ്പള്ളി സ്വദേശി സമീഹ് ആർ കെ , ആനയുടമ ,പാപ്പാൻ എന്നിവർക്കെതിരെയാണ് കേസ്.
ഈ മാസം 18നായിരുന്നു സംഭവം. വിവാഹ ചടങ്ങിനായി വരന് സഞ്ചരിക്കാനായിരുന്നു ആനയെ ഉപയോഗിച്ചത്. ഇതിന്റെ ദൃശ്യങ്ങളും നവ മാധ്യമങ്ങളിൽ വ്യാപകമായി പ്രചരിച്ചിരുന്നു. ഇതിന് പിന്നാലെയാണ് പോലീസ് നടപടി സ്വീകരിച്ചത്. ഇത്തരം ആഘോഷങ്ങള്ക്കായി ആനയെ ഉപയോഗിക്കുന്നത് നാട്ടാന പരിപാലന ചട്ടത്തിന് എതിരാണെന്ന് ചൂണ്ടിക്കാട്ടിയായിരുന്നു നടപടി.