ഒരു ഐസിസി ടൂര്ണമെന്റിലും സിംബാബ് വെയ്ക്ക് കളിക്കാന് കഴിയില്ല.
സിംബാബ്വെ ക്രിക്കറ്റിന്റെ ഐസിസി അംഗത്വം റദ്ദാക്കി. ഐസിസി നിയമമനുസരിച്ച് അതാത് രാജ്യങ്ങളിലെ ക്രിക്കറ്റ് ബോര്ഡുകള് സ്വതന്ത്രമായാണ് പ്രവര്ത്തിക്കേണ്ടത്. എന്നാല് ഈ നിയമങ്ങള് സിംബാബ്വെ ക്രിക്കറ്റ് ബോര്ഡ് ലംഘിച്ചതായി കണ്ടെത്തിയതിനെ തുടര്ന്നാണ് ഐസിസിയുടെ നടപടി. വിലക്ക് വരുന്നതോടെ രാജ്യത്തെ ക്രിക്കറ്റ് ബോര്ഡിനുള്ള ഐസിസിയുടെ എല്ലാ സഹായങ്ങളും നിര്ത്തലാവും.
ക്രിക്കറ്റ് ബോര്ഡില് രാഷ്ട്രീയ ഇടപെടലുകള് ഉണ്ടാവരുതെന്നാണ് ഐസിസിയുടെ നിലപാടെന്ന് ചെയര്മാന് ശശാങ്ക് മനോഹര് വ്യക്തമാക്കി. ‘ഐസിസി ഭരണഘടനയുടെ ലംഘനമാണ് സിംബാബ് വെയില് നടന്നത്. ഇത്തരം പ്രവണതകള്ക്കെതിരെ കര്ശന നടപടിയെടുക്കും. സിംബാബ് വെയില് ക്രിക്കറ്റ് തുടരണമെന്ന് ഐസിസിക്ക് ആഗ്രഹമുണ്ട്. എന്നാല് അത് ചട്ടങ്ങള്ക്ക് അനുസരിച്ചായിരിക്കണം.” സഹായം നല്കുന്നത് നിലയ്ക്കും എന്ന് മാത്രമല്ല, ഒരു ഐസിസി ടൂര്ണമെന്റിലും സിംബാബ് വെയ്ക്ക് കളിക്കാന് കഴിയില്ല. മൂന്ന് മാസത്തിനകം ബോര്ഡിന്റെ പ്രവര്ത്തനം കാര്യക്ഷമമാക്കാനും ഐസിസി ആവശ്യപ്പെട്ടിട്ടുണ്ട്.
