കെ പി എ സി ലളിതയ്‌ക്ക്‌ വ്യക്തി എന്ന നിലയിൽ ആരെയും സന്ദർശിയ്ക്കാനുള്ള അവകാശം ഉണ്ട്. പക്ഷെ സംഗീത നാടക അക്കാദമി അധ്യക്ഷ സ്ഥാനത്തിരിയ്ക്കുന്ന ഒരാൾ സ്ഥാനത്തിൻറെ അന്തസ്സും ആ സ്ഥാപനത്തിന്റെ സാമൂഹ്യവും കലാപരവുമായ ഉത്തരവാദിത്തങ്ങൾ ഉയർത്തിപ്പിടിയ്ക്കാൻ ബാധ്യസ്ഥയാണെന്ന് കലാ സമൂഹം വിശ്വസിയ്ക്കുന്നു. ഇത്തരമൊരു സന്ദർശനം എല്ലാ പ്രതിലോമതകൾക്കും എതിരെ കനത്ത ജാഗ്രത പുലർത്തേണ്ടുന്ന വർത്തമാന കാലത്തിൽ, തികച്ചും തെറ്റായ, മൂല്യമറ്റ എതിർ ചിന്തകൾക്ക് വഴിയൊരുക്കും എന്നതിൽ തർക്കമില്ല.

സമ്പത്തും കുറ്റ കൃത്യങ്ങളും തമ്മിലുള്ള വിടവ് കുറഞ്ഞുവരികയും കുറ്റകൃത്യങ്ങളെ സമ്പത്തു ന്യായീകരിയ്ക്കുകയും ചെയ്യുന്ന സമകാലിക രാഷ്ട്രീയ-സാമൂഹ്യ യാഥാർത്യം പേടിപ്പെടുത്തുന്നതാണ്. അത്തരം പ്രവണതകൾക്കെതിരെ സ്വയം ശബ്ദമാകുന്ന കലാ സമൂഹത്തെ സംരക്ഷിയ്ക്കാനും പ്രചോദിപ്പിയ്ക്കാനും ഉദയം ചെയ്തതെന്ന് വിശ്വസിക്കുന്ന, അക്കാദമി പോലെയുള്ള സ്ഥാപനങ്ങളുടെ തലപ്പത്തു ഇരിയ്ക്കുന്നവർ നടത്തുന്ന, ഇത്തരം പരസ്യമായ അരാഷ്ട്രീയ പ്രകടനങ്ങൾ രാജ്യത്തു നടപ്പാക്കാൻ ശ്രമിച്ചുകൊണ്ടിരിയ്ക്കുന്ന ഫാസിസ്റ്റു അജണ്ടകൾക്കു ആക്കം കൂട്ടാൻ മാത്രമേ ഉപകരിക്കൂ.

Also Read: മലയാള സിനിമയിലെ ഔദാര്യങ്ങളുടെയും സഹായങ്ങളുടെയും കഥകള്‍; ലളിതയെ പോലുള്ളവര്‍ പറയുന്ന പുതുകഥകളും

സമൂഹത്തിൽ മാറ്റത്തിന്റെ ചാലക ശക്തിയായി പ്രവർത്തിയ്ക്കുന്ന കലാ- സാഹിത്യ പ്രവർത്തനങ്ങൾക്ക്, ചുക്കാൻ പിടിയ്ക്കേണ്ട സ്ഥാപനങ്ങളുടെ തലപ്പത്തു, രാഷ്ട്രീയമായി നിയോഗിയ്ക്കപ്പെടുന്നവരുടെ പ്രതിബദ്ധതയും ദിശാബോധവുമാണ് ഇവിടെ അനാവരണം ചെയ്യപ്പെടുന്നത്. മദ്യമുൾപ്പെടെയുള്ള എല്ലാറ്റിനും ഒരു നയമുള്ള കേരളത്തിൽ എന്താണ് സാംസ്കാരിക നയം എന്ന ചോദ്യം ഇവിടെ പ്രസക്തവും അത് ഉണ്ടാകേണ്ടത് അനിവാര്യവുമാകുന്നു.

ശ്രീ കെ പി എ സി ലളിതയുടെ അക്കാദമി അധ്യക്ഷ എന്ന നിലയിലുള്ള ഈ പ്രവർത്തി നാടക ലോകത്തിനു മാത്രമല്ല സാംസ്കാരിക കേരളത്തിന് മുഴുവൻ അപമാനമാണ്. NATAK ന്റെ പ്രതിഷേധം രേഖപ്പെടുത്തുന്നതിനൊപ്പം പദവി രാജിവച്ചു കേരളത്തിലെ കലാസമൂഹത്തിന്റെ അഭിമാനത്തിനേറ്റ കളങ്കം തിരുത്തണമെന്ന് ശക്തമായി ആവശ്യപ്പെടുന്നു.

ജെ.ശൈലജ രഘുത്തമൻ
സെക്രട്ടറി, പ്രസിഡണ്ട്