രവി തക്രാല് എന്ന 27കാരനെയാണ് പശു കുത്തിക്കൊന്നത്
ബൈക്ക് യാത്രികനായ യുവാവിനെ പശു കുത്തി കൊന്നു. നടുറോഡിലേക്ക് അപ്രതീക്ഷിതമായി കയറിവന്ന പശുവിനെ ബൈക്കിടിച്ചതോടെ പശു അക്രമാസക്തമാകുകയും യുവാവിനെ കുത്തിക്കൊല്ലുകയുമായിരുന്നു. ഡല്ഹിയിലെ ദേവ്പ്രകാശ് ശാസ്ത്രി മാര്ഗിലാണ് സംഭവം.
രവി തക്രാല് എന്ന 27കാരനെയാണ് പശു കുത്തിക്കൊന്നത്. ഇയാള് സഞ്ചരിച്ച ബൈക്ക് പശുവിനെ ഇടിക്കുകയായിരുന്നു. പശു മുന്നില് വന്നുപെട്ടതോടെ യുവാവ് വണ്ടി നിര്ത്താന് ശ്രമിച്ചെങ്കിലും സാധിച്ചില്ല. ബൈക്ക് വന്ന് ശരീരത്തില് തട്ടിയതോടെ പശു യുവാവിനെ ആക്രമിച്ചു. വയറ്റില് കുത്തേറ്റ ഇയാളെ ആശുപത്രിയിലെത്തിച്ചെങ്കിലും അപ്പോഴേക്കും മരിച്ചിരുന്നു.
അശ്രദ്ധ മൂലമുണ്ടായ അപകടമെന്നാണ് പോലീസ് ഇതിനെക്കുറിച്ച് പറഞ്ഞത്. റോഡിലൂടെ അലഞ്ഞുതിരിയുകയായിരുന്ന പശു ആരുടെയങ്കിലും ഉടമസ്ഥതയിലുള്ളതാണോ എന്ന് അന്വേഷിച്ചു വരികയാണ്. സിസിടിവി ദൃശ്യങ്ങള് പരിശോധിച്ച് വിശദമായ അന്വേഷണം നടത്തുമെന്ന് പൊലീസ് അറിയിച്ചു.