കേസില്‍ നേരത്തെ അറസ്റ്റിലായ സൂരജിന്റെ ഫേസ്ബുക്ക് പോസ്റ്റും സന്നിധാനത്തുണ്ടായ സംഘര്‍ഷങ്ങളും കണക്കിലെടുത്താണ് സുരേന്ദ്രനെതിരെ കേസെടുത്തത്
ശബരിമല ദര്‍ശനത്തിനെത്തിയ 52കാരിയെ ആക്രമിച്ച കേസില്‍ ബിജെപി സംസ്ഥാന ജനറല്‍ സെക്രട്ടറി കെ സുരേന്ദ്രനെ ഹാജരാക്കാനായി റാന്നി കോടതിയിലേക്ക് കൊണ്ടുപോയി. ഗൂഢാലോചനക്കുറ്റമാണ് സുരേന്ദ്രനെതിരെ ചുമത്തിയിരിക്കുന്നത്. കേസില്‍ നേരത്തെ അറസ്റ്റിലായ സൂരജിന്റെ ഫേസ്ബുക്ക് പോസ്റ്റും സന്നിധാനത്തുണ്ടായ സംഘര്‍ഷങ്ങളും കണക്കിലെടുത്താണ് സുരേന്ദ്രനെതിരെ കേസെടുത്തത്.
ആര്‍എസ്എസ് നേതാവ് വല്‍സന്‍ തില്ലങ്കേരി, വി വി രാജേഷ്, യുവമോര്‍ച്ച അധ്യക്ഷന്‍ പ്രകാശ് ബാബു, കഴിഞ്ഞ ദിവസം അറസ്റ്റിലായ ആര്‍ രാജേഷ് എന്നിവരെയും കേസില്‍ പ്രതിചേര്‍ത്തു. ഈ കേസില്‍ ജാമ്യം കിട്ടിയാലും കണ്ണൂരിലെ കേസില്‍ ജാമ്യം ലഭിക്കാതെ റിമാന്‍ഡില്‍ കഴിയുന്ന സുരേന്ദ്രന് പുറത്തിറങ്ങാനാകില്ല.
