യുവതീ പ്രവേശനത്തിനെതിരെ സമരം ചെയ്തവര്‍ക്ക് നേരെ പോലീസ് നടപടിയെടുത്തത് ശരിയായില്ല
ശബരിമലയില്‍ യുവതികളെ പ്രവേശിപ്പിച്ചാല്‍ താന്‍ ശബരിമല ദര്‍ശിക്കാന്‍ പോകുന്നത് നിര്‍ത്തുമെന്ന് മുന്‍ദേവസ്വം ബോര്‍ഡ് പ്രസിഡന്റ് പ്രയാര്‍ ഗോപാലകൃഷ്ണന്‍. പ്രതിഷേധങ്ങള്‍ക്കില്ലെന്നും അതേസമയം പ്രശ്‌നങ്ങള്‍ ഒഴിവാക്കാന്‍ ജീവന്‍ ത്യാഗം ചെയ്യേണ്ടി വന്നാല്‍ അതിനും തയ്യാറാണെന്നും പ്രയാര്‍ പറഞ്ഞു.
യുവതീ പ്രവേശനത്തിനെതിരെ സമരം ചെയ്തവര്‍ക്ക് നേരെ പോലീസ് നടപടിയെടുത്തത് ശരിയായില്ല. അടിച്ചമര്‍ത്താനാണ് ശ്രമമെങ്കില്‍ ചെയ്യട്ടെ. വിശ്വാസികള്‍ക്കൊപ്പം നില്‍ക്കാനായി താന്‍ ശബരിമലയിലേക്ക് പോകുകയാണെന്നും പ്രയാര്‍ മനോരമ ന്യൂസിനോട് പറഞ്ഞു. ആചാരം തെറ്റിച്ച് സ്ത്രീകള്‍ ശബരിമലയില്‍ കയറിയാല്‍ താന്‍ പിന്നെ ശബരിമലയില്‍ പോകില്ല. വിശ്വാസികള്‍ അധികാരത്തില്‍ വരികയും നിയമത്തില്‍ മാറ്റമുണ്ടാകുകയും ചെയ്താല്‍ മാത്രമേ പിന്നീട് ശബരിമലയില്‍ പോകൂ.
താന്‍ ആര്‍എസ്എസുകാരനല്ലെന്നും കോണ്‍ഗ്രസുകാരനാണെന്നും പ്രയാര്‍ കൂട്ടിച്ചേര്‍ത്തു. പമ്പയില്‍ നാമജപ പ്രതിഷേധത്തില്‍ പങ്കെടുക്കാന്‍ ശബരിമലയില്‍ എത്തിയപ്പോഴാണ് പ്രയാര്‍ സംസാരിച്ചത്. പമ്പയില്‍ രാവിലെ തന്നെ നാമജപ പ്രതിഷേധം ആരംഭിച്ചിരുന്നു.
