ഇറാഖിലുള്ള അമേരിക്കന്‍ സൈനികന്റെ മകനാണ് ഈ കുട്ടിയെന്നു പറയുന്നു
അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന് മുന്നറിയിപ്പ് നല്‍കുന്ന പത്തു വയസ്സുകാരന്റെ വീഡിയോ ഇറാഖിലെയും സിറിയയിലെയും ഇസ്ലാമിക് സ്‌റ്റേറ്റ് പുറത്തുവിട്ടു. ഈ പോരാട്ടം നിങ്ങളുടെ ഭൂമിയില്‍ അവസാനിക്കുമെന്നാണ് വീഡിയോയില്‍ നല്‍കുന്ന മുന്നറിയിപ്പ്.
ജൂതന്മാരുടെ പാവയായ ട്രംപിനുള്ള എന്റെ സന്ദേശം എന്നാണ് വീഡിയോ തുടങ്ങുന്നത്. അള്ളാഹു ഞങ്ങള്‍ക്ക് വിജയവും നിങ്ങള്‍ക്കും പരാജയും ഉറപ്പുനല്‍കിയിട്ടുണ്ടെന്നും യൂസഫ് എന്ന് പരിചയപ്പെടുത്തുന്ന കുട്ടി വീഡിയോയില്‍ പറയുന്നു. ‘ഈ പോരാട്ടം റക്കയിലോ മൊസൂളിലോ അല്ല അവസാനിക്കാന്‍ പോകുന്നത്. അത് നിങ്ങളുടെ ഭൂമിയിലായിരിക്കും അവസാനിക്കുക. അള്ളാഹുവിന്റെ ആഗ്രഹം പോലെ ഞങ്ങള്‍ ജയിക്കും. അതിനാല്‍ പോരാട്ടം തുടങ്ങാന്‍ തയ്യാറെടുത്തുകൊള്ളൂ’- ദ ഹില്‍ റിപ്പോര്‍ട്ട് ചെയ്യുന്നു.
അമേരിക്കന്‍ ശൈലിയിലുള്ള ഇംഗ്ലീഷ് ആണ് കുട്ടി വീഡിയോയില്‍ സംസാരിക്കുന്നത്. ഇറാഖില്‍ യുദ്ധം ചെയ്യുന്ന ഒരു അമേരിക്കന്‍ സൈനികന്റെ മകനാണ് താനെന്നും രണ്ട് വര്‍ഷം മുമ്പാണ് സിറിയയിലെ റക്കയില്‍ എത്തിയതെന്നും കുട്ടി വെളിപ്പെടുത്തുന്നു. അതേസമയം കുട്ടിയുടെ മാതാപിതാക്കളെക്കുറിച്ചുള്ള വിശദീകരണം വീഡിയോയില്‍ പറയുന്നില്ല. ഇവിടുത്തെ മുസ്ലിങ്ങള്‍ക്ക് ജിഹാദിന്റെ അര്‍ത്ഥം അറിയാമെന്നതിനാലും അല്ലാഹുവിന്റെ നിയമം സ്ഥാപിക്കാന്‍ ശ്രമിക്കുന്നതിനാലും ഈ നഗരം ലോകത്തെ ഭയപ്പെടുത്തുന്നുവെന്ന് റക്കയെക്കുറിച്ച് യൂസഫ് പറയുന്നു. 2014 മുതല്‍ ഐഎസിന്റെ ശക്തികേന്ദ്രമാണ് റക്ക.
ഐഎസിന്റെ നിയന്ത്രണത്തില്‍ നിന്നും ഈ നഗരത്തെ മുക്തമാക്കാന്‍ സിറിയന്‍ ഡെമോക്രാറ്റിക് ഫോഴ്‌സ് അമേരിക്കന്‍ നേതൃത്വത്തിലുള്ള അന്താരാഷ്ട്ര സൈന്യത്തിന്റെ സഹായത്തോടെ ശ്രമം ആരംഭിച്ച സാഹചര്യത്തിലാണ് ഈ വീഡിയോ പുറത്തുവരുന്നത്. വീഡിയോയുടെ അവസാനം യൂസഫിന് അജ്ഞാതനായ വ്യക്തി ആയുധ പരിശീലനം നല്‍കുന്നതും കാണാനാകും. അല്ലാഹുവിന്റെ അനുമതിയോടെ അന്തിമ വിധിയുടെ ദിവസം വരെയും തങ്ങള്‍ ഇവിടെ തുടരുമെന്നും യൂസഫ് വ്യക്തമാക്കുന്നു.
